Fréttir



Hlauparar Kjöríss
Þeir Valdimar Hafsteinsson framkvæmdastjóri og Anton Tómasson gæðastjóri hafa heldur betur staðið í ströngu undanfarnar vikur. Þeir tóku báðir þátt í Laugavegshlaupinu svokallaða við góðan orðstír enda búnir að æfa stíft í allan vetur. Síðan gerði Valdimar gott betur og hljóp Jökulsárhlaupið í Hljóðaklettum nú um nýliðna helgi.

Á myndinni má sjá þá félaga í upphafi hlaups í Landmannalaugum.

Blóm í bæ
Nú vinna Hvergerðingar hörðum höndum að því að fegra bæinn sinn fyrir blómasýninguna "Blóm í bæ" sem haldin verður helgina 24.-27. júní n.k.
Við í Kjörís liggjum ekki á liði okkar og á myndinni má sjá þá félagana Óðinn Þrastarson og Kristján Valdimarsson við útplöntun sumarplantna.
Við hvetjum landsmenn alla til að heimsækja Hveragerði þessa daga og njóta ævintýrisins með okkur.

FKA-konur í heimsókn
Í gær mætti í Kjörís galvaskur hópur frá Félagi kvenna í atvinnurekstri.
Kjörorð ferðar þeirra var Flower-Power og mættu þær í ótrúlega flottum klæðnaði af því tilefni.
Við þökkum þessum hressa og skemmtilega hópi kærlega fyrir komuna í Kjörís.

Efling/Starfsafl í heimsókn
Um síðustu helgi fengum við góða heimsókn er starfsmenn á skrifstofu Eflingar/Starfsafls komu í heimsókn.
Við þökkum þeim kærlega fyrir komuna.

Sjálfstæðismenn í heimsókn
Sjálfstæðismenn litu við í heimsókn nokkrum dögum fyrir kosningar.

Kosningar á næsta leiti
Það er greinilega að færast meiri spenna í kosningarnar og í dag fengum við góða gesti frá A-listanum í Hvergerði.
Það voru þrír efstu menn sem komu til okkar í morgunkaffinu þau Róbert Hlöðversson, Jóhanna Ýr Jóhannsdóttir, Njörður Sigurðarsson og Heimir Eyvindarson sem skipar sjöunda sætið.
Við óskum þeim velfarnaðar í kosningunum sem og í öllum  sínum störfum.

Á myndinni má sjá Valdimar framkvæmdastjóra (annar frá hægri) með gestunum.

Skyrís á sunnlenska sveitadeginum
Kjörís tók þátt í sunnlenska sveitadeginum sem haldinn var hátíðlegur síðasta laugardag.
Það var að vanda JötunnVélar á Selfossi sem stóðu fyrir hátíðinni og var gríðarmargt að sjá og skoða. Mikill fjöldi fólks lagði leið sína á svæðið og kynnti sér það sem sunnlensk fyrirtæki hafa upp á að bjóða. Kjörís tók að sjálfssögðu þátt og kynnti Latabæjar-Skyrís sem rann ljúflega í gesti.  Kjörís þakkar góðar móttökur.

Á myndinni má sjá Guðrúnu, markaðsstjóra með ísinn góða og Guðmund Þór, fjármálastjóra JötunnVéla

Latabæjarskyrís kominn í heimilispakkningar
Nú er Latabæjarskyrísinn kominn í heimilispakkningar og á leið í verslanir.
Því geta aðdáendur íssins nú nálgast hann í svo til öllum verslunum landsins.

Heimsókn frá Furugrund
Í dag fengum við góða heimsókn frá leikskólanum Furugrund í Kópavogi.
Þar voru á ferðinni börn í útskriftarferð en þau munu öll ljúka námi frá leikskólanum í sumar og hefja grunnskólagöngu.
Það var eftir því tekið hversu stillt og prúð börnin voru og þökkum við þeim kærlega fyrir komuna til okkar.

3. sæti í Söngvakeppni fyrirtækjanna
Síðastliðinn föstudag fór Vorfagnaður Hvergerðinga fram á Hótel Örk. Venju samkvæmt fór hin árlega söngvakeppni fyrirtækjanna fram og voru sjö atriði sem stigu á stokk.
Kjörís tók að sjálfssögðu þátt og náði þriðja sæti með laginu "Dancing in the street" sem David Bowie og Mick Jagger gerðu frægt á sínum tíma. Textanum var örlítið breytt og hét lagið "Running in the street" í flutningi Kjörís enda sáu hlaupaspírurnar, Anton, Hilmir og Valdimar um dansatriðið.
Það var síðan Heilsustofnun Náttúrulækningafélagsins sem bar sigur úr býtum.